Volksrust

 

STIGTINGSDATUM: 1992

LIDMAATTAL: 76

 

Vanaf die stigting is die gemeente bedien deur di. G. Grobler, F. T. Brits, en tans L. Holder.

 

 Lidmate van Boksburg gemeente het in 1991 na Volksrust verhuis. Hulle het by Newcastle gemeente ingeskakel, maar dit moeilik gevind om betrokke te bly as gevolg van die afstand tussen die dorpe. Daar het ‘n behoefte in hul harte ontstaan om te begin met ‘n Sondagskool vir hulle en ander kinders. Kort boodskappe is ook by hierdie geleenthede deur ge­meentelede gebring. Ds. Gerhard de Wet het begin met die hou van dienste in Charlestown –  ongeveer 9 kilometer vanaf Volksrust. Daar is ook ‘n reeks wederkomsdienste gehou. Naas besoekers het oud-lidmate gereageer op die advertensie en het E.G.-lede saam met belangstellende besoekers begin saamkom en die hartsbegeerte uitgespreek om ‘n eie leraar vir Volksrust. Ds. Gert Grobler is toe deur die SEK benoem vir Volksrust. Die gemeente is vervolgens in Januarie 1992 in die sysaal van die stadsaal gestig. Dit is wonderlik dat die gemeente in hierdie moeilike ekonomiese tye steeds groei en dat siele gered word.

 

  Ons visie is dat siele gered sal word en dat ons gemeente binne 3 jaar selfstandig sal word en die Here ons daartoe in staat sal stel om ‘n eie kerkgebou of saal op te rig.

 

  “En die Gees en die bruid sê: Kom! En laat hom wat hoor, sê: Kom! En laat hom wat dors het, kom; en laat hom wat wil, die water van die lewe neem verniet.” (Openbaring 22:17). Sal ons as kinders van God nie ons stem saam met die Bruidegom voeg deur in hierdie laaste rukkie voor sy koms uit te roep tot ‘n verloregaande mensdom om hul saak met Hom reg te maak nie, terwyl die Bruidegom uit genade nog steeds dringend na hulle roep. As gemeente in Volksrust vra ons u om saam met ons te bid vir die redding van siele en dat ons gebede verhoor sal word.