Strand

 

Die wyk is van meet af aan deur plaaslike predikante van Tygerberg bedien. Hierin het ds. Okkie du Plooy die leiding geneem ten opsigte van die reëling en waarneming van eredienste. Met die merkbare groei van die werkkring is ds. Jurg Prinsloo van Springs op 21 Junie 2001 as vierde leraar van Tygerberg beroep met die benoeming om in die Strand te werk. Op 11 Augustus 2001 is hulle as gesin ontvang en is hy bevestig.

 

  Vir baie jare was ‘n gemeente in die Strand ‘n gebedsaak vir lidmate wat in die omgewing woonagtig was. Met die aanvang van die werksaamhede in die pragtige Helderbergkom – wat bestaan uit die Strand, Somerset-Wes en Gordonsbaai, is hul gebede verhoor. Ons kan getuig van wonderlike belangstelling en meelewing wat veral ook getoon is met reekse dienste wat die afgelope twee jaar gehou is. Reekse is gehou deur drr. Zevenster en Willie Marais asook deur ander predikers. Nie alleen is siele gered nie, maar die gemeente het ook bekend geraak in die gemeenskap.

 

  Ons onmiddellike behoefte is altyd dat die Here ons siele sal gee sodat sy werk kan groei. Daarnaas het ‘n nuwe gemeente altyd ‘n behoefte aan ‘n eie plek van aanbidding. Tans aanbid ons in die saal van die Boland Kollege nadat ‘n saaltjie wat ons van die plaaslike hoërskool gehuur het, te klein geraak het. Bid asseblief vir ons om grond te bekom of ‘n geskikte aanbiddingsplek te verkry sowel as die nodige fondse vir die aankoop daarvan.

 

  My boodskap is: Evangeliseer, bid, werk en dien die Here met ywer en oorgawe. Soek die leiding, vervulling en krag van die Heilige Gees, want die tyd is kort en siele is kosbaar. Kyk op en nie na mekaar nie, volg die Here!