Oos-Londen

 

STIGTINGSDATUM: 29 NOVEMBER 1987

LIDMAATTAL: 52

 

Nog voordat God die hemel en aarde geskape het, het Hy Oos-Londen in vooruitsig gestel en die gemeente sal bly bestaan totdat Koning Jesus ons kom haal. Van net ‘n paar gesinne het die gemeente mooi gegroei. Hierin sien ons die Vader se wewershand. Hy besluit oor elke draadjie (lidmaat) wat ingeweef moet word. Ons verstaan nie altyd hoe Hy werk nie – ons sien maar net die onderkant van sy tapiserie, maar eendag sal ons die voltooide werk van Bo sien.

 

  Die eerste leraar was ds. Harry van Niekerk. Na hom het ds. Conrey Ferreira as leraar voort­gegaan. Met sy vertrek in 1993 was die finansiële stand van die gemeente van so ‘n aard dat die gemeente nie langer ‘n predikant kon onderhou nie. Vanaf De­sember 1993 toe en met November 1995 is alle dienste en bidure deur twee ouderlinge gelei. Die gemeente kon nie meer amptelik as gemeente bestaan nie en daar is besluit om voort te gaan as ‘n wyk van Port Elizabeth Moeder­gemeente. Gedurende hierdie tydperk het die twee predikante van Port Elizabeth die wyk van tyd tot tyd besoek en bearbei. Gedurende November 1995 is die blye nuus ontvang dat kweek­skoolstudent André Bester sy praktiese jaar in Oos-Londen sal deurloop.

 

  Op ‘n spesiale gemeente­vergadering in 1996, waartydens Oos-Londen opnuut as vol­waardige gemeente onder die Oos-Kaapse Ring gestig is, is ds. André Bester as leraar beroep. In Desember 1996 is hy as derde leraar van die gemeente georden. Tydens sy bediening het hulle aanvanklik in ‘n skoolsaal kerk gehou en later in die Sewen­dedagadventiste se kerk­gebou. In Maart 2002 is ds. Bester na Mosselbaai beroep. Hy is op­gevolg deur ds. Johann Dörn­brack wat op 4 Mei 2002 as vierde leraar van Oos-Londen georden is. By dié geleentheid het ds. J. D. Mienie jr.die boodskap gebring en die ordening is waar­geneem deur ds. Jannie Olivier. Ds. Dörnbrack se oupa, wyle ds. Attie Olwagen, was ook teenwoordig.