Gamtoosvallei

 

Op Sondag 26 Oktober 2003 het die gemeente van Gamtoosvallei die 21ste bestaansjaar van hulle pragtige kerk­gebou gevier. Die geleentheid is gevier as ‘n dagkonferensie, ‘n formaat wat goed byval vind in ‘n landelike ge­meenskap. Aangesien ds. Bill Barkley destyds betrokke was by die tot­standkoming van die gemeente, is hy as spreker genooi vir die dag. Drie dienste is gehou, met gesellige saam­kuier en baie heimwee tussen-in.

 

  Rondom 1960 het Uitenhage kerkraad begin om Hankey te bedien as ‘n wyk van die gemeente. Daar was destyds 9 lidmate hier en dienste is elke tweede Sondag gehou, onder andere deur ds. Coenie Smit, wat toe leraar op Uitenhage was. Sondagskool en bidure is ook gehou, aanvanklik in oom Dirk Schellingerhout se huis. As gevolg van die toenemende belangstelling in die dienste, is die ou munisipale gebou as kerk gebruik. Later koop die groepie lidmate die gebou en knap dit op.

 

  Beide di. Saunders en Bekker het as emeriti hulle op Hankey gevestig en hard gewerk om die evangelie hier uit te dra. As gevolg van die gehawende toestand van die gebou, word besluit om ‘n eie kerk te bou. Ds. Bekker het ‘n uiters ruim bedrag geskenk en ná nog skenkings, het oom Sidney Colling die kerk gebou.

 

  Op 30 Oktober 1982 is die S.J. Bekker-gedenkkerk op ‘n luisterryke wyse ingewy. Ds. Saunders het die hoeksteen onthul en ds. Barkley het die boodskap gebring. Hierna het die kerkraad van Uitenhage die S.E.K. genader om proponentskandidaat Peet Schoeman in sy praktiese jaar in die  gemeente te plaas. Op 18 Oktober 1983, byna ‘n jaar nadat die kerkgebou in gebruik geneem is, word die onselfstandige gemeente van Gamtoosvallei gestig met 32 lidmate. Ds. Peet Schoeman word hier georden en bevestig as eerste leraar van die gemeente. In Julie 1985 word die gemeente selfstandig en bou kort daarna die pastorie langs die kerk. Sedertdien het ds. Jannie Olivier en Pieter Swanepoel hier gearbei en ds. Wimpie Snyders is tans die leraar. Gamtoosvallei is een van die min gemeentes waar die kerk gebou en betaal is, voordat daar ‘n gemeente gestig is. ‘n Sendinggemeente (Kleurling) het ook op Hankey tot stand gekom en gaan steeds van krag tot krag.

 

  Hier in die pragtige en vrugbare Gamtoosvallei het die Here die gemeente die afgelope 21 jaar in stand gehou en aan Hom alleen kom al die eer toe.

 

  Ons visie is om ‘n toenemende impak te maak in ons gemeenskap deur die uitdra én uitleef van die evangelie-boodskap aan alle mense.

 

  God se getrouheid staan onwankelbaar vas. Ten spyte van baie negatiewe omstandighede, het die Here getrou gebly. Kom ons gaan die toekoms vreesloos tegemoet en verwag groot dinge van ons grote God – dinge wat pas by die eer van sy Naam.