Die Sinodale evangelisasie- en uitbreidingskommissie

 

“Slaan julle oë op en aanskou die lande, dat hulle wit is vir die oes.” (Joh. 4:35).

 

WAAR HET DIT BEGIN?

Op 5 April 1976, byna 32 jaar na die stigting van die Kerk, is daar ‘n besluit geneem wat seker die grootste impak op die groei van die Kerk gehad het, naamlik die tot­stand­koming van die Sinodale Evangeli­sasie- en Uitbreidingskommissie, kortweg bekend as die S.E.K. Ons doel is om die boodskap wat aan die Kerk toevertrou is, uit te dra deur middel van evangelisasieveldtogte, advertensies, druk van literatuur en die stigting van nuwe gemeentes.

 

  Baie is deur die jare deur hierdie kommissie gedoen om die Kerk bekend te stel. Derduisende be­kendstellingsblaadjies is laat druk en advertensies is landwyd versprei.

 

  Die lede wat in die eerste kom­missie gedien het, was di. Attie Olwagen (oorlede), Fanie Hugo, Lambert van Sittert, Fred Haupt, Hennie Storm (oorlede), Chris Cronje (oorlede) en mnr. Johan Annandale.

 

  Sedert die ontstaan van die S.E.K. het daar talle gemeentes tot stand gekom deur die kommissie se ywer en inisiatiewe. Die eerste gemeente wat gestig is, was Parow – vandag bekend as Tygerberg, een van die grootste gemeentes in die Kerk.

 

DIE ORGANISERENDE EVAN­GELISASIE­SEKRETARIS

Binne 2 jaar het die werk só uitgebrei dat die kommissie genoodsaak was om ‘n voltydse werker te benoem om die doelstelling van die S.E.K te bevorder, naamlik die groei van die Kerk in onbereikte plekke en gebiede in Suid-Afrika.

 

  Ds.Lambert van Sittert is kort daarna benoem in die amp as Organiserende Evan­gelisa­sie­sekre­taris, kortweg bekend as die O.E.S. In 1983 het ds. Haupt hom opgevolg tot 1990 toe hy verplig was om weens gesondheidsredes uit die amp te bedank. Hierna is ds. Van Sittert weer in die amp bevestig. Ander leraars wat in die amp gedien het, is di. Hennie Prinsloo, Bill Barkley en Frik Lombard (sr.), die huidige O.E.S.

 

STIGTING VAN NUWE WERK­KRINGE

Die stigting van nuwe werkkringe geskied met die hulp van die S.E.K. en het ten doel om werkkringe te ontwikkel tot selfstandige gemeentes. Dit is ‘n Bybelse metode vir die uitbreiding van die koninkryk van God. Elke werkkring is ‘n punt waarvandaan die lig van verlossing in daardie omgewing skyn en uit­gedra word.

 

  Deur werkkringe te stig, word groter trefkrag aan die evangelie verleen. Tot eer van die Here kan getuig word dat talle siele deur die jare in ons land daardeur gered is. Talle werkkringe wat deur die S.E.K. gestig is, het tot bloeiende selfstandige gemeentes ontwikkel. Uit sulke gemeentes het alreeds ander ge­meentes tot stand gekom – ‘n bewys dat die stigting van nuwe werkkringe ‘n dinamiese en kragtige wyse van uitbreiding is. Sodoende is daar veel bygedra om die koninkryk van ons geliefde Here Jesus Christus uit te brei.

 

ONTWIKKELENDE GE­MEEN­­­­­­TES

Daar is tans 13 ontwikkelende gemeentes onder die sorg van die S.E.K. Bid asseblief vir die volgende gemeentes en leraars.

Amanzimtoti: Ds. Johan Cloete

Durban: Vakant (Tydelike sorg – ds. Frik Lombard)

Orkney: Ds. Willie du Plessis

Phalaborwa: Ds. Herbie Lyon

Potgietersrus: Ds. Willie de Wet

Upington: Ds. Martyn Devenier

Vryheid: Ds. Hendrik Weyers

Benoni: Ds. Gert Grobler

Louis Trichardt: Ds. Tertius Smit

Oudtshoorn: Ds. Hennie Vorster

Port Elizabeth Suid: Ds. Kobus v. Jaarsveld

Richardsbaai: Ds. Pieter Loots

Volksrust: Ds. Llewyllen Holder

 

  Dit is met dankbaarheid teenoor die Here dat daar uitgesien kan word dat die gemeentes van Benoni, Richards­baai en Upington binne die afsien­bare tyd selfstandig sal word.

 

UITDAGING

Die uitdaging vir die S.E.K. word al hoe groter! Ons kan en mag nie hiervoor terugdeins nie. Ten spyte van tye wat moeiliker word, veral op materiële gebied, moet die evangelie bly uitgaan na verlore siele rondom ons.

  Die S.E.K. kan in die uitvoering van sy taak net so doeltreffend wees as wat die Kerk die kommissie daartoe in staat stel, dit wil sê deur elke gemeente en lidmaat se onder­steuning hetsy finansieël of deur gebed.

 

DANKBETUIGING

Die S.E.K. wil al die Kerkrade, Ringe, CVV’s, Sondagskole en individue wat deur die jare finansiële steun verleen het, van harte bedank. ‘n Bydrae tot evangelisasie bereik ‘n verlore siel.

 

  Bid asseblief vir die S.E.K. – di. Rudy Beukes, Johan Botha, Hennie Prinsloo, Danie van Rensburg en Frik Lombard (O.E.S.).

 

EVANGELISEER VANDAG – MÔRE MAG TE LAAT WEES!